ສະບາຍດີ ຜູ້ອ່ານທີ່ໜ້າຮັກທຸກທ່ານ (ທີ່ຫຼົງເຂົ້າມາ) 😁
ກ່ອນອື່ນໝົດ ເນື່ອງຈາກວ່ານີ້ແມ່ນການຂຽນບລັອກຄັ້ງທຳອິດຂອງຂ້າພະເຈົ້າ! ຜິດພາດປະການໃດ ຂໍໂທດຂໍອະໄພມານະທີ່ນີ້ດ້ວຍ
ມື້ນີ້ຂໍນອກກະແສຈາກຮູບເງົາທາງຝັ່ງ Hollywood ຂ້າມມະຫາສະໝຸດມາແຖບໂຊນອາຊີ (Asia) ບ້ານເຮົາພີ້ແຫຼະ
ຕົບມືຕ້ອນຮັບ ຮູບເງົາຄຸນນະພາບຈາກຝັ່ງ Bollywood!!!!!!!! (ແປະ ແປະ ແປະ) 👏🏻👏🏻👏🏻
‘Pk’ ແມ່ນຮູບເງົາອິນເດຍແນວນະວະນິຍາຍວິທະຍາສາດ ທີ່ຕະຫຼົກ ແລະ ໄດ້ຖືກພິຈາລະນາໃຫ້ເປັນໜັງອິນເດຍທີ່ດີທີ່ສຸດຂອງປີ 2014. ຂ້າພະເຈົ້າກໍຂໍຢືນຢັນ, ນັ່ງຢັນ ແລະ ນອນຢັນອີກສຽງໜຶ່ງວ່າດີອີ່ຫຼີ ຫຼັງຈາກທີ່ໄດ້ສຳຜັດດ້ວຍສອງລູກຕາຕົວເອງ.
ອະ ອະ ອະ ຢ່າຟ້າວຖອນຫາຍໃຈ ແລະ ເຮັດໜ້າໝົດອາລົມແບບບໍ່ເຊື່ອ ເປີດຈິດເປີດໃຈ ຮູບເງົາອິນເດຍເລື່ອງນີ້ມີດີກວ່າພະເອກນາງເອກຮ້ອງເພງແລ່ນໄລ່ກັນຂ້າມໜ່ວຍພູ!
ປ.ລ ເນື້ອຫາຕໍ່ໄປນີ້ບໍ່ມີການເປີດເຜີຍເນື້ອຫາສຳຄັນໃນເລື່ອງແຕ່ຢ່າງໃດ (ສະບາຍໃຈໄດ້😁)
ດັ່ງທີ່ເຮົາຮູ້ກັນດີປະເທດອິນເດຍເປັນປະເທດທີ່ມີຄວາມຫຼາກຫຼາຍທາງດ້ານສາສະໜາ ແລະ ຫຼາຍໆສາສະໜາກໍ່ມີຕົ້ນກຳເນີດຢູ່ທີ່ນັ້ນເຊັ່ນ: ສາສະໜາພຸດ (Buddhism), ຮິນດູ (Hinduism), ຊິກ (Sikhism), ພາມ (Brahmanism), ເຊນ (Jainism). ແຕ່ລະສາສະໜາກໍຈະມີທຳນຽມປະຕິບັດທີ່ແຕກຕ່າງກັນອອກໄປ, ເຊິ່ງຍ້ອນຄວາມແຕກຕ່າງນີ້ເອງໄດ້ເຮັດໃຫ້ເກີດຄວາມແຕກແຍກທາງດ້ານຄວາມເຊື່ອ ຕ່າງຄົນຕ່າງຄິດວ່າສາສາໜາທີ່ຕົນເອງນັບຖືນັ້ນດີກວ່າ. ສະນັ້ນ, ສາສະໜາແມ່ນເລື່ອງທີ່ຂ້ອນຂ້າງອ່ອນໄຫວ ຫຼື ກົງກັບສັບພາສາອັງກິດທີ່ວ່າ ‘Sensitive’ ຫຼາຍຢູ່ທີ່ປະເທດອິນເດຍ, ແຕ່!ຮູບເງົາເລື່ອງນີ້ກ້າທີ່ຈະຍົກເອົາຫົວຂໍ້ນີ້ຂຶ້ນມາຕີແຜ່ ແລະ ເຮັດໃຫ້ຄົນເບິ່ງກັບໄປຕັ້ງຄຳຖາມກັບໂຕເອງຄືນວ່າ: ເອີ! ນີ້ແມ່ນ ‘ຄວາມເຊື່ອ ຫຼື ຄວາມງົມງວາຍ?’ ເພາະສອງຄຳນີ້ແມ່ນມີແຕ່ເສັ້ນບາງໆກັ້ນໄວ້ຢູ່.
ເນື້ອເລື່ອງຂອງໜັງໂດຍຫຍໍ້
ມະນຸດຕ່າງດາວທີ່ເດີນທາງມາໂລກເພື່ອປະຕິບັດພາລະກິດການສຳຫຼວດດາວໂລກ, ລະຫວ່າງທີ່ມາຮອດ ລາວໄດ້ຖືກລັກ ຣີໂໝດ ທີ່ໃຊ້ໄວ້ເອີ້ນຍານອາວະກາດມາຮັບເພື່ອເດີນທາງກັບດາວຂອງຕົນເອງ, ດ້ວຍເຫດນີ້ເອງເຮັດໃຫ້ພີເຄໄດ້ຕິດຢູ່ທີ່ດາວໂລກ. ການຜະຈົນໄພຂອງມະນຸດຕ່າງດາວຢູ່ທີ່ຕ່າງດາວໄດ້ເລີ່ມຕົ້ນຂຶ້ນ. ພີເຄປຽບເໝືອນເດັກນ້ອຍໄຮ້ດຽງສາທີ່ຕ້ອງຮຽນຮູ້, ປັບຕົວ ແລະ ລອງຜິດລອງຖືກເພື່ອໃຫ້ສາມາດດຳລົງຊີວິດຢູ່ໂລກໄດ້. ລາວໄດ້ອອກຕາມຫາ ຣີໂໝດໂດຍຖາມກັບມະນຸດໂລກວ່າ: ‘ເຈົ້າເຫັນຣີໂໝດຂ້ອຍບໍ່?’ ແລະ ທຸກຄົນຈະຕອບກັບພີເຄເປັນສຽງດຽວກັນວ່າ: ‘ບໍ່ຮູ້, ມີແຕ່ພະເຈົ້າເທົ່ານັ້ນທີ່ຮູ້’ ດ້ວຍເຫດນີ້ພາລະກິດຕາມຫາ ‘ພະເຈົ້າ’ ຂອງພີເຄ ກໍໄດ້ເລີ່ມຕົ້ນຂຶ້ນ!!! ອ້າວແລ້ວວວວວ ພີເຄ ຊິໄດ້ພົບກັບພະເຈົ້າຂອງໂລກມະນຸດຢູ່ບໍນໍ? ຫະຫະຫະ 🤔🤔🤔
ໃນລະຫວ່າງພາລະກິດຕາມຫາພະເຈົ້າ ພີເຄໄດ້ມາພົບກັບ ຈັ໊ກກູ ນັກຂ່າວສາວຫົວສະໄໝໃໝ່ທີ່ຕ້ອງການຢາກຕີແຜ່ການເຊື່ອຖື ‘ຜູ້ຈັດການຂອງພະເຈົ້າ’ ຫຼາຍເກີນຄວນ. ຈັ໊ກກູ ເກີດຄວາມສົນໃຈໃນພຶດຕິກຳ, ຄວາມຄິດ ແລະ ການຕັ້ງຄຳຖາມ ແບບແປກໆຂອງພີເຄ. ຈັ໊ກກູ ສັນຍາວ່າຈະຊ່ວຍ ພີເຄ ຕາມຫາ ຣີໂໝດແຕ່ ພີເຄຕ້ອງໄດ້……. (ໄປເບິ່ງເອົາເອງ ຫະຫະ)
‘ມາຕິດຕາມເອົາໃຈຊ່ວຍ ມະນຸດຕ່າງດາວຄົນໜຶ່ງ ທີ່ບໍ່ຮູ້ຫຍັງກ່ຽວກັບໂລກ ແຕ່ກັບສາມາດສອນໃຫ້ມະນຸດໂລກຜູ້ທີ່ອາໄສຢູ່ໂລກ ໃຫ້ເຂົ້າໃຈກັບສັຈທຳຂອງໂລກ ‘
ຄວາມເຫັນຂອງຂ້າພະເຈົ້າ
ເຕັມ ‘10 ເອົາໄປເລີຍ 9.5’ 0.5 ທີ່ຕັດໄປຍ້ອນ ຊັງຕາພະເອກ ອິດອກກກ (ແນມເທິງ) ນັ້ນຕາ ຫຼື ໄຂ່ຫ່ານ ເຫັນລະປວດຕາແທນ 55555
ເນື້ອຫາໂດຍລວມດີຫຼາຍ ຮູບເງົາບໍ່ພຽງແຕ່ຕັ້ງຄຳຖາມໃຫ້ຄົນເບິ່ງຄິດຕາມເທົ່ານັ້ນ ຄຳຕອບຂອງຄຳຖາມທີ່ຮູບເງົາໄດ້ຜູກປົມໄວ້ ແມ່ນໄດ້ຖືກຄາຍ ແລະ ເປັນຈຸດ Peak ທີ່ຄາດບໍ່ເຖິງ ທັງໆທີ່ມັນກໍເປັນພຽງຄຳຕອບທຳມະດາແຕ່ເປັນຫຍັງເຮົາຄືຄິດບໍ່ເຖິງ ແລະ ເຮົາຈະເຫັນວ່າການຢຽດສາສະໜາ ເປັນອີ່ຫຍັງທີ່ໄຮ້ສາລະຫຼາຍ.
ທ້າຍສຸດ ແຕ່ບໍ່ສຸດທ້າຍ ນີ້ຈະເປັນຕົວຊ່ວຍກາລັນຕີວ່າຮູບເງົາເລື່ອງນີ້ໜ້າກິນ ເຮີ້ຍ! ໜ້າເບິ່ງ, ໜ້າດູ ແລະ ໜ້າຕິດຕາມແທ້ໆ ໂອະ ^o^
